Fransanın Val-de-Marn departamentində yerləşən Villeneuve-Saint-Georges şəhərində bələdiyyə polisinin fəaliyyəti ətrafında yaranmış qalmaqal məhkəmə araşdırmasına səbəb olub.
Hafta.az xəbər verir ki, yeni mer Kristell Niasmenin təşəbbüsü ilə daha sərt əməliyyatlar aparmaq səlahiyyəti verilən bələdiyyə polisi barədə daxil olan çoxsaylı şikayətlərdən sonra 7 polis əməkdaşı cinayət məsuliyyətinə cəlb edilib.
İstintaq bu ilin yanvar-aprel aylarında edilən bir neçə şikayətdən sonra başlanıb. Milli polis Villeneuve-Saint-Georges bələdiyyə polisinin qərargahında əməliyyat keçirərək, 9 polis əməkdaşını və 2 videomüşahidə mərkəzi operatorunu saxlayıb. Dindirilmələrdən sonra 7 polisin işi ağırlaşdırıcı hallarda zorakılıq, əmlaka ziyanvurma, qanunsuz yaşayış sahəsinə daxilolma və saxta sənəd tərtibetmə kimi ittihamlarla məhkəməyə göndərilib. Onlardan 5-i məhkəmə nəzarəti altına alınıb və polis fəaliyyəti göstərmələri qadağan edilib.
İstintaq materiallarına görə, polis əməkdaşlarının zorakılıq tətbiq etməsi, prosedurlara əməl etməməsi və bəzi əməliyyatlar zamanı şəhərin müşahidə kameralarının qəsdən başqa istiqamətə çevrilməsi barədə iddialar araşdırılır. Bir neçə şikayətçi polis tərəfindən döyüldüyünü, elektroşok cihazı və gözyaşardıcı qazdan istifadə olunduğunu bildirib.
Mer Kristell Niasme polis əməkdaşlarını müdafiə edib və məhkəmə prosesinin nəticəsini gözlədiyini deyib. O, şəhərdə təhlükəsizliyin təmin edilməsində bələdiyyə polisinin mühüm rol oynadığını vurğulayıb.
Zərərçəkənləri müdafiə edən vəkillər isə bələdiyyə polisinin kifayət qədər hazırlıqlı və nəzarət altında olmadığını iddia edərək, bu vəziyyətin polis zorakılığına yol açdığını bildiriblər.
Təqsirləndirilən 7 polis əməkdaşının məhkəməsi sentyabrın 24-də Kretey məhkəməsində keçiriləcək.
