Ukrayna Ali Radasına müvəqqəti işğal dövründə Rusiya işğalı altında olan Krım Muxtar Respublikası və Sevastopolda coğrafi yer adlarının dəyişdirilməsi prosedurlarını tənzimləyən 15439 nömrəli qanun layihəsi daxil olub.
Hafta.az yazır ki, ukraynalı deputat Tamila Taşeva bildirib ki, qanun layihəsi Ali Rada sədrinin birinci müavini Aleksandr Korniyenko, Krım tatarlarının milli lideri, deputat Mustafa Əbdülcəmil Krımoğlu və digər deputatlarla əməkdaşlıq çərçivəsində hazırlanıb.
Qanun layihəsi, mövcud qanunvericiliyə əsasən yer adlarının dəyişdirilməsindən məsul olan qurumların Krımın işğalı səbəbindən fəaliyyət göstərə bilməməsi nəzərə alınmaqla, yaşayış məntəqələrinin və digər coğrafi adların dəyişdirilməsi üçün müvəqqəti mexanizmin yaradılmasını nəzərdə tutur.
Bu kontekstdə, Ukrayna Nazirlər Kabinetinə Krımdakı coğrafi yerlərin tarixi adlarının bərpası üçün adların dəyişdirilməsi prosesinə başlamaq və ya birbaşa həyata keçirmək səlahiyyətinin verilməsi planlaşdırılır. Qanun layihəsi həmçinin bu prosesin həyata keçirilməsi üçün vaxt cədvəlini müəyyən edir.
Qanun layihəsinə Sovet dövründə, xüsusən də Krım tatarlarının deportasiyasından sonra dəyişdirilmiş tarixi yer adlarının bərpası daxildir.
Taşeva bu dəyişikliklərin Ukraynanın yerli xalqlarının nümayəndəlik orqanları ilə məsləhətləşmələr yolu ilə ediləcəyini bildirərək əlavə edib: "Əsl tarixi toponimiyanın bərpası bizim birbaşa məsuliyyətimizdir".
