Tel-Əviv hökuməti ABŞ-ın İrana qarşı son bombardmanlarında iştirak etməsə də, İsrail ordusu gələcək hücuma hazırlaşır. ABŞ və İsrailin 28 fevralda İrana hücumlarından sonra Tel-Əviv əsasən həm Tehranla danışıqlardan, həm də yenidən alovlanan münaqişədən kənarda qalıb.
Hafta.az yazır ki, “Wall Street Journal”ın məlumatına görə, Vaşinqton administrasiyası İsraildən əməliyyatda iştirak etməməyi xüsusi olaraq istəyib.
Bundan əlavə, ABŞ-ın Körfəz ölkələrindəki müttəfiqləri İsrail hücumlarının müharibənin bölgəyə yayılmasına səbəb olacağından narahatdırlar. Onlar Ağ Evə Təl-Əvivin əməliyyata qatılmamasını təmin etmək üçün təzyiq göstərirlər.
Anonimlik şərti ilə danışan ərəb rəsmiləri də İsrail ordusunun hücumlarda iştirak edəcəyi təqdirdə İranın ABŞ ilə danışıqlar masasına qayıtmasının daha çətin olacağını bildirirlər.
London Kral Kollecindən Andreas Kriq də ABŞ ilə İran arasında son zamanlar yenidən baş verən qarşıdurmalarla bağlı şərh verir: "Gərginliyin məhdud şəkildə artdığını görürük. Bütün tərəflər danışıqlar masasına qayıtmağın bir yolunun olduğunu bilirlər. Lakin israilliləri cəlb etsəniz, vəziyyət tam xaosa çevrilə bilər".
Ərəb rəsmiləri İsrailin müharibəyə girməsinin qaçılmaz olduğunu iddia edirlər. Onlar bildirirlər ki, əgər Tramp İrana qarşı daha geniş hücumlar etmək istəsə, İsraildən kömək istəyəcək.
CNN-in məlumatına görə, İsrail ordusu irəli hücuma hazırlıq görür.
İsrail lideri Benyamin Netanyahu bazar ertəsi gecəsi təhlükəsizlik kabinetinin rəsmiləri ilə görüşüb. Anonimlik istəyən mənbə bildirib ki, görüşdə İsrailin münaqişəyə qarışa biləcəyi mümkün ssenarilər müzakirə olunub. Bunlara İsrailin Vaşinqtonun xahişi ilə müharibəyə qoşulması, İranın Təl-Əvivdən cavab hücumu başlatması və ya İsrailin qaçılmaz təhlükə kimi qəbul etdiyi şeyin qarşısını almaq üçün hücum etməsi daxildir.
Görüşdə iştirak edən İsrailin maliyyə naziri Bezalel Smotriç dünənki açıqlamasında İrana qarşı iqtisadi təzyiqin artırılmasının onların müharibə strategiyası üçün müsbət olduğunu vurğulayaraq deyib: "Ən vacib məqsədimiz - və bu, mütləq ABŞ ilə birgə səy olmaq məcburiyyətində deyil - rejimi sabitsizləşdirmək və zəiflətməkdir".
İsrail Baş Qərargah rəisi Eyal Zamir də bazar günü bildirib: "Biz müharibəyə qayıtmağa hazırıq; bizə zərər verən hər kəsə qarşı böyük güclə hərəkət edəcəyik".
