Əli Şərbətov Məşədi Dadaş məscidinə imam təyin edilib. Əli Şərbətov Cəlilabadda anadan olub. 46 yaşlı yeni imam keçmiş Bakı İslam Universitetində ali təhsil alıb. Daha sonra Qafqaz Müsəlmanları İdarəsinin təşəbbüsü ilə Liviyaya oxumağa göndərilən Şərbətov 2000-2019-cu illərdə İslam Universitetində müəllim işləyib. Saray Cümə məscidi və Ceyranbatan məscidində imam olaraq çalışan Əli Şərbətov bu gün Məşədi Dadaş məscidinə imam vəzifəsinə təyin olunub.
Həftənin KOSMONAVTLARI
Türkiyənin ilk kosmonavtları Tuva Cihangir Atasever və Alper Gezeravci olacaq. Bunu İstanbulda Ataturk Hava Limanında Türkiyənin Havaçılıq, Kosmos və Texnologiya Festifalı – Teknofest-2023-də çıxışında Türkiyə Prezidenti Rəcəb Tayyib Ərdoğan açıqlayıb.
Həftənin MƏRASİMİ
Böyük Britaniyada keçiriləcək tacqoyma mərasimində vətəndaşlar sədaqət andı içəcəklər. “Lordların Sədaqət Bəyannaməsi” bölməsi “Xalqın Sadiqlik Bəyannaməsi” olaraq dəyişdirilib. Milyonlarla insan mərasimi ekranlarda izləyəcək və orada təqdim edilən and mətnini oxuyacaq. Yeni düzəlişlə tarixdə ilk dəfə olaraq kralın dövlət başçısı olduğu bütün Millətlər Birliyi ölkələrinin vətəndaşları krala sədaqət andı içməyə çağırılacaq. Qeyd edək ki, Britaniya mayın 6-da 96 ildən sonra ilk tacqoyma mərasiminə hazırlaşır.
Həftənin İSTƏYİ
Çeçenistan rəhbəri Ramzan Kadırov ordu yaratmağı düşündüyünü açıqlayıb. Kadırov bunu məzlum xalqların maraqlarını qorumaq üçün etdiyini bildirib. O, həmin ordunun asayişin bərpası üçün canlarını verməyə hazır olan vətənpərvərlərdən ibarət olacağını qeyd edib. "Bu, çox çətin yoldur, lakin biz buna çalışırıq və irəliləyirik", - deyə Kadırov əlavə edib.
Həftənin TƏQLİDİ
ABŞ-nin keçmiş Prezidenti Donald Tramp 27 apreldə qatıldığı tədbirlərin birində yenidən prezidentliyə namizəd olacağını açıqlayan 80 yaşlı ABŞ rəhbəri Cozef Baydeni ələ salıb. Tramp bu dəfə Baydenin unutqanlığını təqlid edib. Tramp Baydenin Şimali Karolina ştatındakı çıxışında boş yerə əl sıxaraq yolunu tapmağa çalışdığı anları xatırladıb. "Hara gedirəm? Hansı cəhənnəmə gedirəm? Çölə çıxmaq istəyirəm. Buradır, yox, başqa yerdir", - deyə həmin anları yada salıb.
Həftənin QAZANANI
Səudiyyə Ərəbistanının “əl-Nəsr” klubunun portuqaliyalı hücumçusu Kriştiano Ronaldo “Forbes” jurnalının versiyasına görə dünyanın ən çox qazanan idmançılarının reytinqinə başçılıq edir. “Forbes” 2022-ci il mayın 1-dən 2023-cü il mayın 1-dək idmançıların qazandıqları maaşla yanaşı, bütün mükafat və bonusları da nəzərə alıb. Forvardın gəliri 136 milyon dollar qiymətləndirilir. İkinci yerdə 2022-ci ildə reytinqə başçılıq edən “Paris Sen-Jermen” klubunun hücumçusu Lionel Messi qərarlaşıb. O, 130 milyon dollar qazanıb.
