Rəsmi məlumatlara görə, İranda Novruz bayramının davam etdiyi son 18 gündə baş verən 14178 yol qəzasında 747 nəfər həyatını itirib, 16905 nəfər isə yaralanıb.
Hafta.az-ın yazdığına görə, İran Polisinin Trafik Şöbəsinin baş direktoru Timur Hüseyni açıqlamasında bildirib ki, ən çox ölümlə nəticələnən qəzalar Kirman, Fars, Xorasani Rezəvi, Xuzistan və Sistan-Bəlucistan əyalətlərində baş verib.
Bildirilib ki, Kirmanda 66, Farsda 64, Xorasani Rezəvidə 53, Xuzistanda 48, Sistan-Bəlucistanda 46 nəfər yol qəzalarında həyatını itirib.
Qəzaların əksəriyyəti sürücülərin diqqətsizliyi və ötmə əməliyyatlarının düzgün aparılmaması nəticəsində baş verir.
İranda Novruz bayramı ilə əlaqədar 4 günlük tətil elan edilsə də, bir çox vətəndaşlar illik məzuniyyətlərini birləşdirərək tətil müddətini 2 həftəyə qədər artırırlar. Bu vəziyyət şəhərlərarası yollarda sıxlığın artmasına və ölümlə nəticələnən yol-nəqliyyat hadisələrinin baş verməsinə səbəb olur.
