İyunun 16-da Bakı-Astara və Bakı-Qazax yolunun Qaradağ rayonu ərazisindən keçən hissəsində tıxac yaranıb.
Bu barədə hafta.az-a rayonlardan Bakıya qayıdan sərnişinlər məlumat veriblər. Verilən məlumatda o da qeyd olunur ki, hazırda tıxacın uzunluğu 7-8 kilometri əhatə edir. Sərnişinlər bildirirlər ki, polis postlarına yaxın hissələrdə tıxac yaranıb.
Buna səbəb onların sənədlərinin yoxlanması və avtomobildə olan hər bir sərnişinin sənədlərinə baxılmasıdır. Sərnişinlər 3-4 saatdır ki, “probka”da gözlədilərini bildirirlər.
Sərnişinlər və sürücülər onu da qeyd ediblər ki, polis alternativ yollardan istifadəyə imkan vermir. Çünki əks halda sənədlərin yoxlanmasından yayınma halları qeydə alına bilər.
O da vurğulanır ki, Bakıda ciddi karantin rejiminin tətbiqi və 3 günlük istirahətlə əlaqədar paytaxtda yaşayan sakinlər doğmalarını ziyarətə gediblər. Bu gün iş günü olduğu üçün geri qayıtmağa məcbur olublar. Nəticədə Qaradağ postunda, Ələt yaxınlığında tıxaca düşüblər.
